9/2/2008 • Kategori: UNLULERIN HAYAT HIKAYELERI
Ayhan Alptekini 1965 şi 3’anas Art’aşenis dibadu. P’rofe3ianuli Liseşen dip’loma uğun. 9 3’aneri na rt’uşen doni musika’şi int’eresi uğun. İptineri na gelaçapt’u inst’rument’epe melodik’a do mandolini rt’u. Ağnemordaloba muşis musik’aten na ibodert’u şeni ocaxi muşik emus reak3ia var o3’iru mara xususurot cuma muşik guri do mxuci meçu Ayhanis. Mara namtini uk’itxu k’oçepek muşi musik’uri dulyapes k’ai toliten var o3’k’ert’es. Edo Ğormotoni dulya muşis elaz’i3apt’es. Ugagne mitxanepek Ayhanis, mskva na var ren, coxope gyodves “ avara”, “udulyeli” steri.
1982 şi 3’anas ar ç’andas maartani farot ibiru. Ok’uleti “K’erk’eli Murun3xepe” coxoni musik’uri grup’i k’ides megabrepe muşi k’ala. Edo “K’erk’eli Murun3xepe” k 1983 şen 1985 şakis Noğedişen Rizinişa çkvaneri oput’e do raionepes ç’andapes k’on3ert’i meçu. Sarayuri musik’as “k’anuni” coxoni inst’rument’iten, Xalk’uri musik’as “bağlama” coxoni inst’rument’iten do T’avernuri musik’asti “orgi” coxoni inst’rument’iten p’rogramape duxvenu. Malimurobaşi servisi muşişk’ule ek’onomiuri sebebepeten k’erk’eli mutepeşi goşibğu. Edo mukti k’eyborduri musik’a oxvenuşa gyoç’k’u. Unk’ap’anuri p’iyasa içinuşakis t’avernuri musik’a ikipt’u. Ok’ule nanaşnana, babaşnana muşi do Nuri coxoni p’ap’uli muşişen na ognu Lazuri birabapeten rep’ert’uvari muşi ixamp’u. Edo şuri muşiti ik’apet’inu. Maartani albumi muşi 1993 şi 3’anas gamaxtu. Xalk’is mo3’ondu muşi Lazuri birabape do dest’anepe.
“Oi Nana” coxoni albumi muşiten çkva Uçamzoğari gemabirepes gza o3’iru. Edo emuten çkva gemabireşi musik’uri gagnapati iktu. Ayhanişk’ule musik’aşi speros na amaxtu mitxanepeşi obestu do obiruşi st’ilepe iktiru. Obiruşi st’ili muşi p’olifonik’uri speroşa oktiru izmons mara mtelot var. Çodinurot 2003 şi 3’anas “Axi ulani axi” coxoni xolo doloxe muşis Lazuri birabape na uğun ar albumi gamiğu. Ayhan Alptekinişi gamaçkvineri mteli albumepeşi coxope aşo ren: “Moxti ma memiuci”, “Sidoma Ayhani-Lazuri”, “Hei deli guri”, “Eğindu Uçamzoğa”, “Oi nana”, “Axi ulani axi-Hulya”.
Alptekinik Lazuri nena do k’ult’uraşi berepeşen arteri ren. Muk am nenas doloxe dibadu. Edo guri muşis Lazuri nenaşi derdi na uğun şeni, Lazuri birabape ibirs do aşopeten mcveşi nenas mxuci meçaps.
Kalıcı Bağlantı Yorum (0) Yorum yaz! Arkadaşına Gönder!
0 yorum yazılmıştır
<
Get your own Chat Box! Go Large!
>